2010

بسم الله الرحمن الرحيم

في الحقيقة أنا بعتبر التدوين هو أهم حاجة في حياة الإنسان بإعتبار إن التدوين ده حاجة دائمة مش زي الكلام ...أقل حاجة إن في يوم من الايام لو جيت وبصيت على الموضوع ده تاني هفتكر كويس أنا كنت عاوز أقول إيه ...علشان كده هكتب أهدافي خواطري اللي ناوي باذن الله اعملها في 2010 والله الموفق

*خمس أهداف عاوز أعملها في2010

2- التخلص من عادة التدخين

3- إقامة الصلاة بشكل منتظم

4- إيجاد فرصة عمل مناسبة وتوسيع مجال عملي

5- تقوية نشاطاتي الاجتماعية والرياضية

**خمس حاجات عاوز أتعلمها في 2010

1- عاوز أتعلم الفوتوشوب

2- عاوز أتعلم مهارات التنمية البشرية

3- عاوز اتعلم زيادة عن الهندسة والطاقة

4- عاوز أتعلم مهارات التسويق الجيد

5- عاوز أتعلم فرنساوي

خمس حاجات عاوز انميها في نفسي

1- تنمية مهارات الإتصال مع البشر

2- تنمية القدرات الفنية الخاصة بباللغة اليابانية

3- تنمية مهارة التأمل والتركيز والحكمة في إتخاذ القرارات

4- تنمية مهارة التحكم في العصبية وده الحمد لله بعد ما عرفت إلى حد ما اقللها في 2009

5- تنمية الثقافة الفكرية

الخطة المبدئية :

أروح الجم وأحضر كورسات واشترك في حملات

يعني أنا بكده اتمنى إن كل حاجة تمشي زي منا عاوز إن شاء الله

مصر والجزائر ..مباراة جماهير وليست مباراة شعبين

بسم الله الرحمن الرحيم

في ظل التطورات العنيفة والتي تجري الآن على الساحة العربية وخاصة الساحة المصرية والجزائرية فيما يتعلق بمباراة كرة قدم فلقد سمعنا القيل والقال وشاهدنا مالم نشاهده في ال20 سنة الاخيرة بين بلدين ما دارت بينهم من أحداث تجعل الوجه يحمر خجلا والرأس تنظر إلى الأرض من شدة الحزن ....ما حدث وما يحدث بين البلدين يجب أن نقوم بشرحه وتفصيله وتوضيحه بشكل موضوعي دون الخوض في سيادة البلد ...فاللذي حدث كانت نتيجة تعصب جماهير كرة من البلدين ولم يكن الشعب كله هكذا ...فيجل أن نفصل جيدا بين شعب مصري يمتاز بالكرم والمروئة أو كما نقول بالجدعنة...وشعب جزائري يمتاز بوازعه الديني في اختيار الالفاظ وأيضا شعب كريم وطيب القلب ...

إني هنا أخوض تجربة من حياتي افتخر اني اعيشها بل بالعكس فسوف أكتب في تاريخي الشخصي أنني تعرفت على شخصيات تحب بلدها حبا تطير فيه الرقاب إذا لزم الأمر ولكن يعون جيدا احترام الخصم وهذا هو الشعب الجزائري ....لكن الجمهور الجزائري فهو جمهور عنيف بطبعه لا يقبل أن يذوق مرارة الهزيمة ولا يقبل هذا من منخب له تاريخ كمنتخب مصر ..وهذا لسبب بسيط ..ألا وهو أنهم يريدون أن يفرحوا ..يريدون أن يتنفسوا بعد أن هيمنت مصر على تاريخ الكرة العربية والأفريقية السنوات الأخيرة ...ناهيك عن أن كل جزائري يفخر ويزداد فخرا أن التاريخ كتب له تفوق منتخبه على المنتخب المصري وذلك لما عند مصر من أهمية ...دعني أثبت لك شيئا عزيزي القارئ ...عندما إشتعلت الفتنة بين الشعبين كان المستفيد الأكبر هو الإعلام الجزائري وذلك بفضل الشهرة التي اكتسبتها الصحف الجزائرية على حساب مصر والاعلام المصري ولقد نجح الاعلام الجزائري في استدراجنا وذلك لهدف واحد فقط ..وهو الربح المادي ...

عزيزي القارئ ..يجب أن نفصل بين الجمهور والشعب ولا يجب أن نعمم ...ما يوجد بداخلنا من كره نحو الشعب الجزائري وما بداخلهم من كره تجاه الشعب المصري فهو كره غير مبرر ...ولن أقول نحن أخوة وعرب وأشياء من هذا القبيل ولكن سوف أقول عيب عليكم أيها المسلمون من جراء هذه التصرفات الصبيانية ....وسوف أنهي حديثي باستنتاج لهذه المعركة الرياضية بأن الجمهور المصري رافض للمنتخب الجزائري باعتباره انه فريق مطمور لم يظهر وغاب عن الساحة الرياضية لفترة تزيد عن 8 سنوات ..وهذا الظهر المفاجئ غير مقبول عند معظم جماهير الكرة المصرية وقد أكون أنا واحد من هذه الجماهير ..ولكن عند التكلم بموضوعية في هذا الشأن سوف نرى أن المنتخب الجزائري يملك من الفنيات التي تؤهله للوصول لكأس العالم وهذا مالم ترضى الجماهير المصرية الاعتراف والاقرار به ..بل وظلت الجماهير المصرية على اصرارها الشديد في أن المنتخب الجزائري عبارة عن منتخب شباب محترفة يلعبون في الخارج ولا يعرفون شيئا عن الجزائر ...في المقابل فإن الجمهور الجزائري رافض لهذا المنطلق ورافض لما يدعون به المنخب المصري الحبيب بأنه منخب مغرور وا،هم الفراعنة ويجب أن نشعلهم يذوقون مرار الهزيمة ...وهذا تفسير الجمهور الجزائري وليس الشعب الجزائري ...الكرة الجزائرية بشكل عام تميل إلى التعب الكروي الشديد حتى على مستوى الأندية المحلية وبقوة ...ولا يوجد إنسان من هذا الشعب قد ينكر هذا وفي النهاية هذه كرة قدم ...وفي آخر كلماتي سوف استشهد بمثل بسيط الا وهو نحن المصريين هزمنا ايطاليا بطلة كأس العالم ودخلنا التاريخ الرياضي ...ضعوا انفسكم مكان الجمهور الجزائري والشعب الجزائري ..أعتقد ان رسالتي قد وصلت

وشكرا

منتخب مصر

يا ترى هيفضحونا قدام رواندا ولا هيعملوا ايه

في بداية الأمر خليني أتكلم على مصيبة المنتخب المصري

المنتخب المصري لما لعب قدام البرازيل كان مشرف بصراحة

ولما لعب قدام إيطاليا بغض النظر عن طريقة اللعب اللي بصراحة معجبتنيش خالص على عكس مباراة

البرازيل إلى إن الناس فرحت من ان منتخب زي مصر يغلب منتخب ايطاليا اللي هو بطل العالم

لكن اجي بقى للكارثة

هزيمتنا من أمريكا 3 صفر

وبعد كده الردود المستفزة من الجهاز الفني واللي بتقول إن المنتخب كان مرهق من الماتشين اللي فاتوا (البرازيل وايطاليا

طبعا ده غير ان ساعتها في 3 لعيبة بسبب الاصابات ملعبوش

محمد زيدان واحمد فتحي و سيد معوض

طبعا دي عفرة وخيبة ما بعدها خيبة

لسبب بسيط

رقم واحد : المنتخب ارهق من مبارتين لعبوهم مع فرق قوية أمال لو راح كاس العالم هيعمل ايه ؟؟

رقم اتنين : الكل اعتقد انه اكتشف حاجة مهمة جدا ساعة ماتش أمريكا ...ألا وهي ان المنتخب المصري وبقولها بكل أسف معندوش احتياطي يشيل الفريق

باختصار شديد المنتخبات المتفوقة زي البرازيل وايطاليا واسبانيا ان عندهم خط احتياط قوي جدا يقدر يسد في اي لحظة

مش لمجرؤد ان مثلا يطلع محمد زيدان يطلع يبقى خلاص مفيش هجوم في مصر

دي كارثة

منتخب مصر رايح رواندا واحنا كلنا معندناش أمل انه يتأهل لكأس العالم لان رواندا هتحارب في المتش ده وهيجرونا وهيخلوا حيلنا يتهد علشان الصيام

ومن الاخر كده يا حسن يا شحاته انت انتهيت وراحت عليك

شكرا لك ومبروك لزامبيا او الجزاير التاهل

وخللي ليبتون تنفعك

التغيير مطلوب

التغيير مطلوب

أيام كتيرة جدا بنقول الكلمة دي لنفسنا بشكل متكرر

"أنا محتاج اغير "

بس حتى لو غيرت هتوصل لايه ؟؟؟

أنا مؤمن إن اللحظة بتعدي وإن اللحظة دي بحلوها ومرها هتعدي

بس أرجع و أقول إن التغيير اللي أنا بطالب بيه هو تغيير في عقليتي

التغيير في التخطيط والتدبير

التغيير في كيفية قضاء اليوم

التغيير ممكن يحدث بشكل مبدئي وبطريقة عقلية بحتة

ان تفكيرك يزداد توسع كل يوم

تخطيطك بيزداد كل يوم

التغيير ممكن يكون داخلي في العقل بس

مش لازم يبقى خارجي في اللبس وكده

محدشش ينكر ان ساعات في أشياء لا تتغير في شخص زي طباعه مثلا

بس ساعات فعلا في ظروف كتيرة ممكن تخلي مبادئك وأفكارك وحتى طباعك ممكن تتغير

لكن المهم التحكم في التغيير ده ومتخلهوش يسيطر عليك سيطرة قد تجعلك تتوقف في لحظة علشان محتاج تغير لانك زهقت من التغيير

شكرا

حاجة نفسي فيها بجد

النهاردة انا هتكلم على حاجة نفسي فيها وانا عارف كويس اوي انها مستحيل تحصل بس حاجة جت في خيالي
المهم
طبعا كل واحد مننا عنده حياته الخاصة
اللي بيروح الشغل واللي بيروح الجامعة
واللي بيروح القهوة
المهم مش ده موضوعي
اللي بفكر فيه بقى ايييه ؟
ان اليوم اللي انت بتشتغل فيه ده بيحصل حاجات كتيرة فيه صح ؟
ياترى بقى لو فيه واحد كده عامل زي خيالك ويقف جمبك ويدون كل حاجة اتقالتلك وكل حاجة انت قلتها بلسانك
لا والاجمد انه يقدر يقرى افكارك من غير ماتتكلم ده لو في حالة انك مرهق جدا ومش قادر تتكلم
هيبقى جامد ها

بس

مع نفسي شوية 1

مش عارف بس النهاردة حبيت اكتب حاجات بتيجي دماغي كتير زي حكاية كده
بس على الرغم من كده لسه هوايتي في النقد موجودة خصوصا اني بحاول انميها في كثير من الأحيان
ولكن
ماذا عساني أن أفعل (بغة عربية صحيحة )(أصلا وانا بكتب الكلمة دي إتخنقت علشان عمال أحاول جيدا في كتابة الهمزة علشان في حد أعرفه لو لوقاني مش كاتب الهمزة ممكن يولع فيا وفي الهمزة وفي نفسه :)
مش عارف أقول إيه بس حبيت أدردش دردشة خفيفة وأتكلم شوية عن عيشتي في الجزاير
الجزاير بلد ظريف بس شعبها خنيق جدا وعصبي وحمقي على الفاضي بس قلوبهم طيبة
يعني بق على الفاضي
المهم
بلد خالية من التطور المعماري
خالية من الخدمات
والفساد فيها منتشر
لكن أنا بتكلم على وضعي
أنا في غرفة صغيرة 3متر في 3 متر
حاطط فيها مطبخ تقريبا
أمي الله يكرمها مظبطاني
ربنا يكرمها يا رب
المهم
أنا كنت بقول إيه ؟
اه
غرفتي باختصار هي عالمي ومملكتي الخاصة اللتي أعمل بها كل ما يحلو لي بلا قيود
يمكن هو القيد الوحيد إني معليش صوت لكمبيوتر والدش والتلفزيون
اه الحمد لله عندي دش وتلفزيون
ياحلاوة يا ولاد
المهم
القوضة دي فعلا بيتي
بختلي بنفسي فيها
بفكر لوحدي دونإزعاج من العالم الخارجي سواء أهل البلد ولا العيون الضيقة
الله يحرقهم جميعا
ماعلينا
القوضة دي بيني وبنها عشرة كبيرة وأيام كانت حلوة وأيام عاملة زي إحساس الكانغارو اللي بيبقى في بطن أمه
أنا زهقت من الكتابة
نكمل بكرة

إيه ده
أنا كتبت 229 كلمة بس ؟
لازم أعلي الكلام جه شوية
معلش بقى بزهق من الكتابة جدا
تحياتي

آراء شخصية

قعدت افكر كتير ولقيت اني عاوز اكتب آرائي الشخصية في كل القضايا المعاصرة والغير معاصرة وباختصار شديد جدا ...

ملحوظة : هذه آراء شخصية بحتة ورأيي صواب يحتمل الخطا وراي غير خطأ يحتمل الصواب ..

وهقوم بكتابة آرائي على شاكلة سؤال وجواب ...

نبدا بقى ...

س : السفر والغربة ؟

ج: أنا مع السفر علشان جوه البلد بهدلة وبره البلد بهدلة ..فبهدلة مع تقدير مادي احسن من بهدلة وقلة قيمة جوه البلد.

س: الجواز ؟

ج: الجواز سترة ولازم الكل يفكر فيه ..علشان الغرب دخلوا في دماغنا افكار كتيرة غلط الله يحرقهم

س: عمل المرأة ؟

ج: ضد عمل المرأة ..لكن اذا شروط العمل مناسبة ليها ولجوزها أو اهلها خلاص ..وفي النهاية حسب رغبة المرأة

س : الناس ؟

ج : الناس مشكلتها الناس

س: الحب ؟

ج: موجود بس اللي يقدر عليه وعلى تعبه ..ويعرف ينميه ويربيه كويس لان الحب عامل زي النبات اهتميت بيه هيكبر وهيثمر ..مهتمتش بيه هيدبل ويموت ..

س: الصداقة ؟

ج: موجودة بردو ..بس محتاجة تفاهم وانسجة الصداقة اقوى من أنسجة الحب على ما اعتقد ..

س: الرشوة؟

ج: حرام بس إذا كنت مضطر وعارف ان علشان اخد حاجة هيا من حقي ...ساعتها بس مضطر اعمل كده وبالنسبة لراي الدين الله اعلى واعلم ..

س: الماضي؟

ج: ذكريات مبحبش أفتكرها

س: الحاضر ؟

ج: الحاضر حاضر لازم أتعايش معاه .

س: البرد؟

ج: أحلى من الحر

س: الحكومة المصرية ؟

ج: الحكومة المصرية بجحة

س: الدول العربية ؟

ج: تستاهل اللي بيجرالها

س: أيام زمان ؟

ج: أيام زمان مش بحبها ..لأنها للأسف أحلى من الحاضر

س: التفائل ؟

ج: للاسف ملياش فيه علشان مبحبش أتوجع

س: الفيس بوك ؟

ج: منظمة كبيرة ومضيعة وقت وبردو سلاح ذو حدين ..

س: تربية الشعر للولاد؟

ج: النجم اللي بيربي شعره ده أصلا مش راجل

س: مارينا ؟

ج: مسخرة وفسق وبجد أنا حزين على اللي بيحصل هناك

س: الافلام العربي ؟

ج: نفسي نعمل حاجة عدلة

س: الاهلي والزمالك ؟

ج: انا أهلاوي بس كون اني اتعصب للاهلي ابقى غبي زي ما فيه ناس كتير بتعمل كده ..هما هيدفعولي فلوس يعني ؟ وللاسف هيفضل صراع ابدي بين المصريين..

س: الممثلات المصريات ؟

ج: الله يحرقهم

س: عمرو خالد ؟

ج: كويس بس رغاي ..الله يكرمه

س: مصطفى حسني ؟

ج: شاب كويس ومحترم ..بردو ربنا يكرمه

س: وجدي غنيم ؟

ج: اكتر داعية إسلامي بحبه وبحترمه ..ربنا يكرمه

س: أحمد حلمي ؟

ج: ذكي جدا وبعجبني تفكيره

س: أحمد فؤاد نجم ؟

ج: برنس

س: القراءة ؟

ج: للاسف أنا لا اقرا كثيرا لكن القراءة فعلا لابد منها

س: الديمقراطية ؟

ج: السياسة الطبيعية لملائمة الاوضاع الراهنة (ده على مستوى الحياة الاجتماعية )

س: الجامعة؟

ج: مرحلة حقيقية للنضوج و بعيدة عن الواقع ..فهمي باختصار مرحلة اللا ضغوط

س: الطفولة ؟

ج: مرحلة من حياتي لا اتذكرها

س: قانون الطوارئ؟

ج: حجة جامدة جدا علشان الحكومة تعمل اللي هيا عاوزاه

س: قانون المرور الجديد ؟

ج: علشان أمناء الشرطة ياخدو رشوة أكتر

س: التعدد ؟

ج: إذا كان بسبب واضح فمفيش مشاكل والنيات لله ...

لغاية هنا كفاية بس يتبع

بلا هم

موضوع الساعة ...اللي بيتكلم فيه كل شباب مصر التعبان واللي مش تعبان
الجواز
آفة القرن العشرين
انا من الناس اللي عاوز اتجوز على فكرة بدري كده ...عارفين ليه ؟؟علشان الواحد يخلف عيل كده لما يكبر يعرف يصاحبه كده يا جماعة
بجد هيبقى احساس حلو جدا ....طبعا في اسباب تانية
الاستقرار ..حفظ النفس...الكلام الكتير ده كله
بس بقى على راي المثل
العين بصيرة والايد قصيرة
ولو حتى والله الايد طويلة ما هيكفي
الجواز بقى غالي جدا والحياة في مصر بقت غالية جدا والواحد بجد وصل لمرحلة هيعمل ايه يا جماعة ؟؟؟يقطع نفسه ؟؟؟ولا يسرق ولا يعمل ايه ؟
الجواز بجد بقى صعب جدا ...الاسعار بقت رهيبة ..شقة ب200 الف جنيه ده غير بقى الكهربئيات والعفض والنجارة والمحارة والفرح والشبكة والمهر
يعني من الاخر كده الجوزا ده عبارة عن خراب بيت مستعجل
ده غير اني رافض اجيب شقة واظبطها وتيجي واحدة على الجاهز تاخد الكلام ده وتتجوزني ال ليه ؟ علشان معاه شقة ...لا طبعا انا ارفض هذا الموضوع ..انا مش عاوز واحدة تيجي على الجاهز
انا عاوز واحدة تشاركني كده كل لحظة حطيت فيها القرش على القرش علشان اجيب ام الشقة دي ..انا مش بطلب منها انها تحط مبلغ معايا بس على الاقل المشاركة الوجدانية مطلوبة في الايام السودة دي ...البنات الله يسامحهم مبقاش يقدروا يرفعوا من روحك المعنوية ..داحنا مش بنطلب حاجة غير انهم يقفاو جمبنا بقلبهم بس ...بس ازاااااااااااااي ؟؟مينفعش
لازم انكد على اللي خلفوه واخليه يكره عيشة اهله .....الجواز عملية معقدة والبنات بتعنس والاهالي بتكابر والعملية باظت ولسه هتبوظ اكتر
تعقيد المشاكل هو اللي بيعمل الفجوة دي كلها
كل الشباب دلوقتي يقولك جواز مين ياعم خليها على الله ونقعد كده ونقضيها وخلي الشر بعيد ..ده الجواز مصاريف وهم ووجع قلب
ما علينا ...انا عن نفسي مبقتش عاوز اتجوز دلوقتي الا لما الاقي حد كده يبقى عنده دم ويحس بالتعب اللي بعمله علشان اجيب اي حاجة يشارك هو فيها ..شقة بقى عربية ..مكواة رجل مش هتفرق ..ماهو كله هاتيجي الهانم تاخده على الجاهز ...يارب الاقي واحدة مختلفة عن تفكير البنات القاصر ده والاقيها بتشجعني كده الله يهديها ...ويمكن انا وهي نقضيها سفر بما ان حياتي بقت سفر وربنا يستر


تحياتي
اسلام فتحي

انا في مصر

يااااااااااااااااااااااااااااااااااااااااااااااااااااااااااه
بعد 7 شهور انا في مصر
اقول ايه بس .....مصر وحشتني
يمكن مصر بالنسبة ليا هم الاهل والاصحاب
الحياة العملية صعبة وسعات بتجبرك على حاجات مكنتش عاوز تعملها
انا رجعت مصر
رجعت مصر وكان عندي امل ان الحاجات اللي خسرتها وانا في الجزاير ارجع احاول انها تعود ....بس للاسف الحال مش زي ماهو
والناس بتتغير ..بصراحة كنت متدايق طبعا في الاول ...بس بقى الموضوع عادي جدا ....اهم حاجة بقى ان الواحد يفكر في حياته ومستقبله وخلاص
الحمد لله اني بثبت نفسي من دلوقتي ونا في السن ده .....
اهم حاجة اني افضل كويس واقدر ارجع اسلام اللي كان طريقة تفكيره ومبادئه واحدة مش بتتغير
خلاص اللي كانو عزاز عليا وحاولت اني اثبتلهم انهم لسه عزاز على قلبي بس هم مدوش الفرصة لنفسهم انهم يسمعوا ويقدروا ...خلاص بقى فعلا مبقتش فارقة معايا ...انا في حالي وهم في حالهم وخلاص انا فل اوي كده ....
ومصر بقى لازم اتمتع بكل حاجة فيها قبل ما اسافر علشان اعرف اكمل المسيرة اللي بداتها من الاول

تحياتي
بعد كده هكتب بقى عن حياتي اليومية في الجزائر لما ارجع

مرض إسلام فتحي

أفادت تقارير صحفية اليوم الثلاثاء بأن المترجم المصري إسلام فتحي مترجم شركة كوجال اليابانية حصل على أجازة بعد أن أصابه برد شديد الإسبوع الماضي .وقالت وسائل الاعلام إن المترجم /23 عاما/ أعرب عن رغبته بالعمل فور شفائه بعد أن قضى نحو يومين يعاني من سخونية دائمة وتنقل خلال هذه الفترة في مستشفى تقع في ندينة شلغوم العيد الجزائرية .وانضم فتحي إلى كوجال في شهر يناير الماضي ليمارس عمله مترجم للغة اليابانية والانجليزية مع الاخوة الجزائرين الذين عانوا معاناة شديدة في التعامل مع اليابانيين حيث أن اللغة شكلت عائق بين الجزائرين واليابانيين في التواصل .يذكر أن فتحي الذي يعاني منذ شهرين تقريبا من إحساسه بالوحدة في البلاد قد قام بترجمة العديد من المقالات اليابانية إلى العربية رغبة منه في إنشاء تواصل بين الشعب المصري و الشعب الياباني كما أن ظهوره في التلفاز المصري كان له الأثر الكبير في إبراز ثقته بنفسه وسط مترجمين يتميزون بالخبرة في اللغة والخبرة معا.

المترجم إسلام فتحي وتصريحاته في الجزاير

أكد النجم المصري إسلام فتحي المترجم الخاص بشركة كوجال اليابانية في الجزائر اليوم الثلاثاء أنه يشعر "بالراحة إلى حد ما" داخل جدران Camp 2 وأنه "سعيد " لوجوده مع هذه الشركة ليزيل بذلك الجدل الدائر حول عدم وجوده في مصر بسبب الخطة التي تتبعها الشركات اليابانية في مصر .وأوضح فتحي أن بعض وسائل الإعلام أساءت تفسير تصريحاته الأخيرة التي أدلى بها يوم الخميس الماضي قائلا "أريد فقط أن أعبر عن ارتياحي الشديد مع شركة كوجال اليابانية وأشعر بسعادة تجعلني أشعر بالرضا لتواجدي بين جدرانه."وأضاف "رأيت أشياء لم تعجبني..،وأنا أتحدث مع كل العاملين والمترجمين وأمزح معهم كثيرا. وقد قلت الخميس الماضي أنني سأعمل أي عمل تضعني فيه الشركة بجانب عملي كمترجم لكنني قرأت اليوم التالي في الصحف أشياء مختلفة لذا فأنا أؤكد من جديد أنني سعيد وأشعر بالراحة مع الشركة".و حول الوظيفة التي يرغب فيها داخل المكتب أشار فتحي "أنا اريد أن أعمل كمترجم ولكن لا مانع لدي من مساعدة الجميع في أعمال أخرى".

انزل على الارض

الكلام أخد وعطى يا عم الحج ....دنا كل ما اقولك كلمة ترد بسئالة ...فاكرني ايه ..واد بريالة ؟؟دنا ناس كتيرة تحب الكلام معايا ..واللي مش عاوز مش فارق معايا ...انزل على الأرض يا عم الحج ..وبططل تتنك على خلق الله ..ده الكمال كله لله

هتبقى لوحدك

هييجي عليك الوقت يا قلبي وتبقى لوحدك....يمكن معاك ناس كتيرة دلوقتي لكن.....هييجي عليك اليوم وتمشي لوحدك...تعافر وتشق طرق كتيرة ولسه بردو لوحدك...علشان كده يا قلبي من دلوقتي اتعلم انك تبقى لوحدك ...

حاجة بسيطة كده

كنت عاوز اعبر عن فكرة واديني عبرت

يا رب يكون المعنى وصل

إسلام فتحي

الطريق المجهول

اتخرجنا خلاص والدنيا لسه ضلمة
ذاكرنا كتير واتئلمنا أكتر والطريق لسه ضلمة
امتى شعاع الشمس هينور علينا ؟؟
وإمتى ييجي اللي احنا عاوزينه في ايدينا ؟؟
في ناس مننا هتجري على لقمة عيشها
واللي مننا هيقول أيام وبنعيشها
الدنيا لسه بخير وده المفروض
لكن هعمل ايه في المفروض !!؟؟
لازم نجري ونجري ونجري لغاية
ما ييجي علينا الوقت ونقول كفاية جري
ولما الوقت ده هييجي هنلاقي نفسنا كبرنا
ولما نلاقي نفسنا كبرنا هنقول بردو كفاية جري وهنفضل نقول يا نجري يا نبطل جري .........................................

الطريق الأسود

الطريق الأسود

أعود إليكم اليوم أحبائي بلون جديد لم تعتادو عليه من قبل ألا وهو لون اللغة الفصحة في مقالاتي

في العادة أنا لا أحب كتابة المقالات باللغة الفصحة ولكن لا أدري مالذي جعلني ودفهني إلى أن انتقي هذا الإسلوب في التعبير عما في داخلي من أحاسيس

هل رغبة مني في التغيير أم رغبة مني في قياس مدى مهارة اللغة العربية الفصحة لدي؟؟

لن أسهب في الحديث ولكن سوف أدخل في صلب الحديث

أختص بهذا الحديث زملائي في قسم اللغة اليابانية

في البداية أحب أن أشكر كل شخص في هذا القسم ممن كانو بجانبي وخلفي (قتب يعني) وممن كانو لي عونا ونصيرا...

لن أفتقد هذه الكلية كثيرا بقدر ما سوف أفتقد رؤية البسمة التي يرسمها القسم في كل روح دخلت هذا القسم.. كل من إنتمى إلى هذا العالم الغريب ...نعم لقد كنا منفصلين عن العالم الخارجي (الأقسام الأخرى) وكأننا ننتمي إلى عالم صغير له حياته الخاصه وله عاداته وله كل شيء يميزه عن الآخرين
لن أنسى أيضا الحزن الذي ينتابنا عند مواجهة إمتحان صعب أو حدوث موقف يؤرقنا جميعا
لن أنسى أيضا ما فعلناه بالأساتذة وما هي المواقف التي مرينا بها وماذا فعلنا بهم وعلى رأسهم رئيس القسم .....

أيام تمضي وأيام قادمة وها هنا نحن جالسين منتظرين النتيجة التي سوف تحسم الأمور لكثير منا ...
فمنا سوف يتجه إلى مرحلةة اخرى من التعليم الجامعي ألا وهي الدراسات العليا ...
ومنا سوف يعمل بما لديه من مؤهلات أخرى غير اللغة اليابانية ...
ومنا من لديه الرغبة الشديدة في المكوث بالمنزل والإكتفاء بما مضى من عذاب وعناء......
ومن من ينتظر حتفه ..أي الجيش ..ولقد شبهت الجيش بالموت وذلك لما قد يصنعه فينا كدارسين للغة ..(سوف ينسيناأإسمائنا )
ومنا من سوف يبحث على وظيفة باللغة اليابانية ولكن هيهات ...

في النهاية لن أطيل عليكم في الحديث ولكن لنسترج الذكريات سويا

...

حياة طفل كبير

القصيدة دي من تأليفي وأتمنى انها تعجبكم

القصيدة بعنوان : حياة طفل كبير

القصيدة يمكن مفيهاش قافية بل هي تميل أكثر إلى النثر ...فاللي عاوز ينقد في الحته دي أنا بررتله الموضوع ده

هذه القصيدة مهداه إلى كل متأمل في وضعنا كشباب مع قليل من الدموع والفرح في ظريق الله وحده فقط يعلم به.

الطفل بيحبي قدامي وبيكبر حبة حبة

حواليه جيرانه وحواليه الأحبة

يكبر شوية وهمومه تزيد

وتزيد دقات قلبه وفوقيها تنهيد

والذكرى تروح وترحل بعيد

وحياة لا فيها ضمانات ولا تأكيد

أهو أنا شايفه تايه وسط الناس

ناس معندهاش لا رحمة ولا إحساس

عمال يعاني الغربة وهو في بلده

وغيره عمال يغرف و يحط في بلده

فعلا دنيا غريبة واللي يعش يا ما هيشوف

جوه بلدي غريب وبره بلدي خسوف

تمت بحمد الله

ثقافة المراجيح

هذه القصيدة صدرت حديثا في ظل ظروف التعديلات الدستورية

وهي من تأليف

إسلام فتحي (أنا يعني )وصديقي الصدوق شادي الحلبي

القصيدة بعنوان : ثقافة المراجيح

عدلوا دستورنــــا صـــحيــح

ودستــــور خـــدتو الريــــــح

خوف جوه قلبي صريــــــــح

من كُتر الكلام والتلمــــــــيح

لا فرح باين ولا تجريــــــــــح

والعبد منا في مهب الريـــــح

ومحدش فاهم ولا تصريــــح

بنود كتيرة على المراجيـــــح

ميفهمهاش غير الفصيــــــح

والواحد منا ثقافته مــــيـــــح

خصوصا في ثقافة المراجيح

تمت بحمد الله

من خاف سلم

السلام عليكم ورحمة الله وبركاته

بعد غيبة طويلة بكتب ليكم النهاردة رغبة مني في إني ابقى متواجد شوية يعني مختفيش
موضوع النهاردة بسيط جدا وظريف
مرة واحد صحبي واحنا كنا قاعدين على القهوة بندردش في احوالنا واحوال مستقبلنا(حوار كل شاب فيكي يا مصر)واحنا قاعدين طلعت من الولعة اللي محطوطة على حجر الشيشة شوية شظاظ نار جه ناحيتنا فروحنا مناديين القهوجي علشان يحط على حجر الشيشة شربوش أو كوخ أو كسوة كما نطلق عليه في مصر وهو عبارة عن حاجة كده مقعرة من الحديد الخيف علشان تحجب خروج رماد الفحم من حجر الشيشة علشان ميبهدلناش ومفتوحة فتحة صغيرة من فوق كده...ما علينا يعني
فلما صحبي حط الكوخ ده راح باصص للناس اللي بردو جت عليهم الشظايا دي وقال لهم :مين خاف سلم يا جماعة ...هههههههه
أنا لما سمعت المثل ده بصراحة اتضايقت اوي وحسيت انه مثل سلبي لانه يضعنا في قالب الخضوع للشيء والاستسلام له
أنا بصراحة مش بحب كده
هنفضل لامتى نخاف
نخاف من الدكاتره ونخاف من اهالينا
لا ونطلع حجج تبرر خوفنا
زي تروح تسأل واحد صحبك تقول له :إنت بتخاف من أبوك يروح رادد عليك يقولك أخاف لا أنا بحترمه ...ومعظم الناس بتخاف
ليه الخوف بقى موجود فينا
بنخاف من الحكومة وبنخاف من اي حد يبقى تبعها
ولو بجحنا فيها وصرخنا بالصوت العالي وقلنا (انا مبخفش ) هنضرب على قفانا علشان مفيش وة هندنا
فبنتبع الحل الاسلم واللي يخرجنا من اي مأزق الا وهو الخوف ......للاسف ده الحل الموجود حاليا
مش الخوف من حد على فكرة ده كل الحوار
بس لخوف على
وعلى دي بتشمل حاجات كتيرة قوي
على حد صاحبك مثلا أو على حد عزيز عليك وبتحبه اوي علشان كده بتقلل من شأنك
أول على ((((((((((مصلحتك))))))))))))وده اللي بقى موجود بشكل كبير قوي وأنا بلمسها كل يوم في حياتي العملية

ده نداء انننا نبطل خوف على أو من ونخلينا صريحين وفعلا مش خايفين غير من ربنا
مش مش خايفين من نظرة الناس لينا
طبعا أنا مقلتش كل حاجة بس ده اللي جه في دماغي لغاية دلوقتي

شكرا وأو اني مكنش أسهبت في الكلام شوية ........تحياتي

الليلة خلصت

الليلة خلصت

سامحوني على التعبير بس ده هوا التعبير اللي أقدر أوصف بيه الإمتحانات

الإمتحانات دي أفشل نظام إتولد في العالم

ما علينا

المهم

الأجازة جت والواحد مش عارف هيعمل إيه .......هيصيع ولا هيشتغل ولا هيقضيها بيتي وخلاص وقهاوي لا إيييييه؟

لا وإيه متشات كاس العالم جت بقى في وقتها

هتضيعلك نص الأجازة بس.........

.........بس بجد الله يخنقهم الARTإحتكروا كل حاجة

وبعد سنتين هنلاقيهم إحتكروا الدوري المصري

واللي عاوز يتفرج على متش الأهلي والزمالك لازم يشتري كارت من عندهم ثمنه 1000باوند شامل طبعا إشتراك القنوات الأساسية(حكايات والافلام 1-2والرياضة 1-2)

والله يا جماعة الواحد بقى مش عارف يعمل ايه في البلد دي

على الرغم إني إتخصصت في مجال بيتقال عليه إنه نادر لكن إيييييييه ...هيهات لمن تنادي

نادر إيه بس يا جدعان

ده طلع مرطرط في السوق

وطبعا الواحد علشان يشتغل ويجيب قرشين نضاف لازم يشتغل في السياحة

وحوار السياحة ده بصراحة أنا مش بستظرفو خالص بالمرة يعني

طاب الواحد هيعمل إيه يا جدعان ................اسرق يعني ؟؟؟؟؟؟؟؟؟؟؟؟؟؟

أنا النهاردة حبيت أدردش دردشة خفيفة كده وهبدأ أكتب أي حاجة في واقعنا

سواء عن الأفلام اللي نازلة الصيف ده أو موقف قابتله ومعجبنيش ده إلى جانب إني ناوي أقدم ليكم جزء بسيط من قصتي

وهيا ذات إسم يمكن يكون إسمه على مسامعكم مألوف لكن القصة دي فكرتها ممكن تكون جديد

القصة اللي أنا سوف أتابع كتابتها هيا (القناص)

ويارب تعجبكم

ده إلى جانب بعد الترجمات الحلوة من الياباني للعربي علشان تعرفوى الناس دي بتفكر ازاي

تحياتي

خواطر لغوية

في البداية هذه هي أول خاطرة لغوية أنقلها إليكم .......

وما أقصده بالخواطر اللغوية هو انني عند قرائتي أو مشاهدتي لشيء ما طرأ في ذهني شيء له علاقة وطيدة (من وجهة نظري)بفعل معين أو قاعدة معينة في اللغة اليابانية لم نستطيع أن نأتي بترجمة واضحة لها ....لذلك قد نجحت في أن أتغلب على بعض القواعد اللغوية في اللغة اليابانية ونجحت في إبراز لغة عربية صحيحة خالية من العيوب في بعض الجمل التي عجزت أنا وزملائي من إيجاد فعل موازي أو جملة موازية لها في اللغة اليابانية.......وعندما تشاهد خواطري ستقول كنت أعلم هذه وكنت افهمها ولكن لم أكن أستطيع أن أعبر بها بلغة عربية سليمة.

أول خاطرة لي هي قاعدة

～～する恐れがある（あります）

هذه القاعدة في ما معناها أن هناك خوف لحدوث شيء ....

هذه ليست لغة عربية صحيحة

لذلك

لقد وجدت كلمة مناسبة لعلها كانت شاردة عن أذهاننا لبرهة

وهي كلمة

مخاوف

هيا معا ننظر لمثال فعلي (من اليابانية إلى العربية)

このガスは環境を破壊する恐れがあります。

الترجمة: مخاوف من أن هذا الغاز سوف يدمر البيئة

この薬は副作用の恐れがあるので医者の指示に従って飲んでください。

الترجمة: هناك مخاوف من وجود آثار جانبية لهذا الدواء ..لذلك يرجى تناوله بإتباع تعليمات الطبيب

______________________________

من العربيةإلى اليابانية:

مخاوف من سقوط ضحايا هولنديين في أفغانستان( لمشاهدة المقال

アフガニスタンでオランダ人の犠牲者が出る恐れがある。

أو

アフガニスタンでオランダ人の犠牲者が倒れる恐れがあります。

مخاوف من انتشار واسع لإنفلونزا الطيور( لمشاهدة المقال

鳥インフルエンザが広大に普及する恐れがある。

كانت هذه أول خاطرة لي في موقعي الخاص

وأتمنى الاستفادة

وإذا أخطأت فإعذروني

(عمل :إسلام فتحي )